(تابع) خطاب الرئيس محمد أنور السادات، بمناسبة عيد العمال، بشبرا الخيمة، 2 مايو 1978
المصدر: "مجموعة خطب وأحاديث الرئيس محمد أنور السادات، في الفترة من يناير إلى يونيه 1978، الهيئة العامة للاستعلامات، ص 395 - 424"

أنا أعتراضى أساسا على قيام عملاء داخل تنظيم اليسار المصرى محناش عايزين عملاء داخل تنظيم اليسار المصرى بتاعنا لأنه بطبعه لا يقبل الولاء لاثنين الولاء لجهة واحدة بس الولاء لمصر. أما الولاء للاتحاد السوفيتي فيقدروا ينشئوا حزب فى أى بلد أخرى مصر هنا لا. الولاء هنا لمصر فقط.

          للأسف كثير من القيادات تحت شعار الديمقراطية والحرية وأن لهم صحيفة اليوم مصرح بها وحسب قانون الأحزاب لأول مرة في تاريخ مصر ما لجأوش لوزارة داخلية ولا أى حاجة يأخذوا تصريح لأن قانون الأحزاب صرح لهم أنهم ينشئوا صحيفتهم ويطلعوها وطلعت منشور زى بالضبط زي ما كانوا بيتميزوا مساكين بالغباء اللي قلتوه عن الاتحاد السوفيتي ما بيصلحوش فى خطوطهم أو ما بيفهموش أبدا فكرهم ان الإثارة وإن يوم 18، 19 دى انتفاضة شعبية كأن الشعب المصرى لما يعمل انتفاضة شعبية لازم يبقى حرامية كله لان اللى طلع فى الانتفاضة دى دا الحرامية وانتو بتتهموا شعبكم بعمل انتفاضة حرامية. شعبكم لا يعمل انتفاضة حرامية بل ينادى ويطالب ويقف ويصمد زي ما كان طول عمره انما اللى عمل الانتفاضة دى شوية حرامية هو ده الشعب المصرى؟ نسميها شعبية لسه مصرة على هذا جريدتهم لغاية آخر عدد ما حدش منعها لغاية النهاردة.

          واللي بيقرأها منكم قرأ الكثير فيها الإثارة ضرب السلام الاجتماعى استغلال معاناة الشعب هى شطارة هي شطارة أن نقول أن الشعب تعبان آه تعبان الشعب تعبان وبيعانى وأنا قايل هذا الكلام أهه باقوله وباعلنه وفى كلامي دلوقت وأنا باعمل النقد الذاتى للحكومة ومن واقع ما طلبتوه أنتم وزى ما احنا ماشيين فى قافلتنا ها نقسم لقمة العيش بيننا كلنا ايا كانت ما دام كلنا بالتساوى بناخد بالتساوى ما فيهاش حاجة ما فيهاش عيب يعني مش عيب نقسمها كلنا وبالتساوى ما فيهاش عيب أبدا.

          يعنى استغلال الكلام ايه فى الجريدة دى يقول ان القطاع العام. الحقوا يا عمال مصر القطاع العام ها يتصفى وخلاص فى سبيله للتصفية عشان تعرفوا عشان اسمعكم حقيقة واحدة تبقى واضحة جملة الاستثمارات المنفذة خلال سنة 77 هى 1636.5 مليون جنيه يعني مليار و636 مليون

<18>