(تابع) خطاب الرئيس أنور السادات أمام مجلس الشعب حول أزمة الشرق الأوسط والعلاقات بالاتحاد السوفيتي

الاشتراكي وفيه سلطة تشريعة.. وفيه سلطة تنفيذية موجودة الجبهة الوطنية. دي المطلوب أيه.. فيه عندنا حزب ناسيين نضيفه للاتحاد الاشتراكي لازم نضيفه وإلا فيه عندنا عباقرة نسينا نضمهم للاتحاد ومن غيرهم الدنيا حتغرق حالة مالهاش حل غير كده  يعني.. أنا مش فاهم لها وضع يعني جبهة وطنية أنا باأقول لا، جبهة وطنية كلام مقصود بيه التخريب النهاردة في عملنا واحنا بنواجه عدونا وبنواجه جبهة وبنواجهه وحدة وطنية واحدة.

اللي طول عمرنا الوحدة الوطنية.. واللي اشتغلنا بيه طول عمرنا الوحدة الوطنية ماعندنا غير هذا..

التجربة لازم حتمشي بإذن الله وليكن معلوما من خلال مجلسكم باكلم شعبنا كله.. شعبنا اللي بامشي في الشارع.. الإنسان بيتهز قلبه ساعة مابامشي في الشارع وباسمع المواطن الفلاح العادي والعامل البسيط ببراءة وباخلاص وبإيمان كل اللي بيقوله.. ربنا معاك.

أنا باكلم شعبنا الطيب الأصيل المؤمن ده.. مافيش عمل خارج الأجهزة الدستورية الموجودة في بلدنا اللي هوه تحالف قوى الشعب العامل أي واحد يفكر في أي شيء خارج هذا التحالف حيعرض نفسه للجزاء الصارخ لأن وحدة البلد ومصير المعركة ومصير البلد فوق كل فرد مهما كانت قيمته ومهما أدعى لنفسه.. لن أسمح بهذا..

بنيجي للنقطة الثانية حكاية التجربة حكيت لكم على قصة التجربة من أول 52 النقطة الثانية اللي أنا باقولها قواعد وضوابط السلوك العام في المرحلة اللي جاية علشان تنجح التجربة لازم يكون فيه قواعد وضوابط السلوك العام.

أنا زي ماقلت أي إنسان عايز أي حاجة مافيه هنا مجلس الأمة يتفضل ييجي اللجان المختلفة موجودة.. ولجان موجودة علشان كل المواضيع اللي ممكن أو الشكاوي اللي ممكن أن تخطر.. اللجنة المركزية والاتحاد الاشتراكي هناك مفتوح بالكامل لأي إنسان عنده أي شيء عايز يقوله.. بس صعوبة الفترة اللى إحنا بنمر بيها .. أنا بأعمل حاجتين متناقضتين في كل المعارك اللي سبقتنا وحاضرب إنجلترا مثلا وأنا حكيت عنها قبل كده في وقت المعركة مايبقاش فيه ديموقراطية وإنجلترا اللي فيه كان تلات أحزاب في البرلمان العمال والمحافظين والاحرار أقروا مذكرات تشرشل كاتب في كتابه البرلمان البريطاني بأحزابه التلاته فوضوه هو وأربعة وزراء سموها وزارة الحرب لقيادة المعركة وقال له وقت ماتدينا خبر ادينا مش عايز ماتديناش لأن طبيعة المعارك لابد فيها أسرار وفيها عمليات كتير قوي وفيه حاجات ماتتقالش ولا يمكن الافصاح عنها إلا بعد سنين وفيه خطوات تتاخد ويتقال عنها وفيه خطوات مايتقالش عنها.

<14>