(تابع) خطاب الرئيس أنور السادات أمام مجلس الشعب حول أزمة الشرق الأوسط والعلاقات بالاتحاد السوفيتي

        على هذا البلد - مصر - مسؤولية كبرى بالنسبة لعالمنا العربي، وبالنسبة لهذه المنطقة التي نعيش فيها. هدف أمريكا واسرائيل من أول المعركة من سنة 67 كان أيه؟ هدف أساسي لازالت إسرائيل وأمريكا عمل عليه ولا زالت إسرائيل تحرض علنا وعالميا وفي الصحافة العالمية عليه هو يوقعوا بيننا وما بين الاتحاد السوفيتي. ويستفزوا أمريكا وحلف الأطلنطي علينا عشان يخوفونا ونقطع علاقتنا بالاتحاد السوفيتي ليه ؟ الصديق الوحيد واقف معانا سياسيا في المحافل الدولية. واقف معانا اقتصادياً.. بنينا السد العالي في عشر سنين.. أمريكا على لسان وزير خارجيتها المستر دالاس في 19 يوليه 56 سجل أمام العالم كله وقال مصر بلد مفلس ولا يستطيع اقتصاده انه يحتمل بناء السد العالي.

        ويا شعب مصر، بيان رسمي طلع ومثبوت في الجرائد وفي التاريخ.. وياشعب مصر إخلص من القيادة اللي عندك واحنا نساعدك. لكن الأساس إن مصر بلد مفلس. اقتصاده لا يحتمل بناء السد العالى. طيب. بنينا السد العالي وطلعنا فوق الأرض المكتسبة الجديدة 11 مليار كيلووات كهربا عليها برامج تصنيع في الأربع سنين المقبلة. مش بس كده برغم المعركة. المعركة فى 67 برغم المعركة وبرغم إن إحنا بنصرف على قواتنا المسلحة أو بلغ ما صرفناه إلى اليوم حوالى 4000 مليون جنيه في الخمس سنوات الماضية. برغم هذا لم تتوقف عملية البناء. أبداً. النهارده اللي عايز يروح يتفضل يروح حلوان السد العالي كان بيشتغل فيه 30 ألف عامل. السد العالي الثاني مجمع الحديد والصلب في هذه اللحظة اللي باأكلمكم فيها بيشتغل 25 ألف عامل في الموقع في هذه اللحظة عشان ينجزوا مجمع الحديد والصلب. السد العالي الثاني الي تكاليفه أد تكاليف السد العالي تمام. ماوقفناش. من بيساعدنا في هذا؟ ايد تحارب وأيد بتبني زي ما قلنا. أيد بنحارب بيها وأيد بنبني بيها مين بيساعدنا في هذا ؟ الاتحاد السوفيتي اللي واقف ويانا.

        ماوقفتش برامج الحرب صحيح عطلت مسيرتنا شوية لكن ماوقفناش، ومامتناش، ومافلسناش، واقتصادنا مش مفلس زي الشهير وزير خارجية أمريكا ماقال سنة 56 ما يستحملش السد العالي لا داستحمل سد عالي وسد عالي تاني وتالت ورابع وماشيين بنبني لصالح مين ده كله بيتبني؟ لصالح هذا الشعب. لصالح قوى الشعب العامل كلها. من فلاحين وعمال، ومثقفين، وجنود، ورأسمالية وطنية، أولادنا اللي بيتخرجوا من الجامعات بنبني ده كله ليه ؟ عشان يطلعوا يلاقوا عمل. وعشان كل انسان يلاقي حياة كريمة وفرصة كريمة خصوصا بعد ما ننتهي إن شاء الله من معركتنا كل هذا يمشي وحملة  تشكيك في صداقتنا بالاتحاد السوفيتي في الفترة الأخيرة. أمريكا وإسرائيل بيبثوا في المنطقة حملة التشكيك ومن الذكاء بحيث انهم بيقولوا طيب واحنا يا أمريكا أدينا إسرائيل كذا فانتوم وتصنيع و.. و.. أداكم الاتحاد السوفيتي أيه ؟ وبعدها بشوية الاتحاد السوفيتي مش عايزكم تحاربوا. الاتحاد السوفيتي عايز لا حرب ولا سلم. الاتحاد السوفيتي عايز قواعد في البلد. الاتحاد السوفيتي عايز امتيازات. الاتحاد السوفيتي مش عارف أيه كل الكلام ده أنتم سامعينه سمعتموه الحملة النفسية الشرسة الموجهة للبلد هدفها واحد بس زي ما قلت لكم إن إحنا ننعزل عن صديقنا الوحيد في الوقت اللي بنبني فيه السد العالي التاني مجمع الحديد والصلب وخمسة وعشرين ألف عامل في الموقع في

<7>