(تابع) خطاب الرئيس أنور السادات في افتتاح الدورة الخامسة للمؤتمر القومي للاتحاد الاشتراكي العربي

         في نفس الوقت كنا ماشيين في تدعيم قواتنا المسلحة، ما بنأبهش للحملات دي كلها. لكن جد موقف جديد، الأمريكان وإسرائيل بيعملوا العالم دعاية إن مصر خرقت وقف إطلاق النار. مصر أدخلت صواريخ للمنطقة. مصر عملت، وابتدوا يشوهوا المعنى اللي العالم كله أحس به من قبولنا للمبادرة.

         في هذا الوقت وصلنا إلى المرحلة اللي ابتدت نذر الشر فيها تبان في الأردن، من اللحظة الأولى اللي وصل للرئيس فيها الله يرحمه هذا الخبر، زي ما تعلموا حضراتكم اتفق مع الرئيس القذافي، وكانوا بيتقابلوا في مرسى مطروح، وأرسلوا للرئيس النميري، وأرسل الرئيس برقية، اللي أرسلت باسم الرؤساء الثلاثة للملك حسين. وقام الفريق صادق رئيس أركان حرب القوات المسلحة لجمهوريتنا للأردن مرة واثنين. ورجع الفريق صادق. ولكن للأسف كان واضح إن فيه تصميم على عمل مبيت معين. وفجأة اندلعت الأحداث في الأردن، اتصلت بنا تونس علشان عقد مؤتمر في القاهرة، وكان الرئيس في طريقه من مرسى مطروح إلى الإسكندرية، عاد في الحال ورحب وعقد المؤتمر في فندق الهيلتون هنا. ولما ييجي الوقت إن شاء الله اللي نكتب فيه تفاصيل ما تم في هذا المؤتمر بشهادة الملوك والرؤساء اللي كانوا حاضرين، حانعرف إلى أي مستوى قومي، وإلى أي روعة كان موقف زعيمنا جمال.

         أمام الكل وبمنتهى الوضوح وبمنتهى الصراحة كان يحترق، كان يحترق فعلا في كل لحظة، وفي كل دقيقة في هذا المؤتمر. لكن كان عنده هدف أساسي، لازم المذبحة تقف ولازم نجنب الأبرياء اللي بيتقتلوا في الشارع أو في بيوتهم أو في المستشفيات. النساء والأطفال والشيوخ، وبعدين القضية الفلسطينية بأكملها، قضية شعب بأكمله، وبعدين أخطر من كل هذا، أحسينا إحنا هنا تماما عن يقين إن أمريكا ما بتضيعش وقتها، وزي ما قريتم بعد كده واعترفوا القواد بتوع أمريكا واعترفوا الرسميين في أمريكا. أمريكا كانت انتهت من إعداد كل شيء للتدخل في الأردن. معنى التدخل كان ايه، كان نسف قضيتنا العربية بالكامل.

         ده المعنى اللي كان الريس حريص إنه يضع كل الملوك والرؤساء العرب أمام مسئوليتهم فيه، وانه مش لازم نضيع دقيقة واحدة، لابد أن نحل هذه الأزمة، وأن يوقف هذا النزيف، حفاظا على قضية شعب أولا، ثم لمنع التدخل الأمريكي الذي يهدف أول ما يهدف لنسف كل القضية من أساسها.

         تفاصيل هذا المؤتمر زي ما قلت لحضراتكم كلها ثابتة عندنا وموجودة وجديرة إن إحنا كلنا نقرأها، ونعرف جمال مات إزاي، ومات ليه؟

         وفي آخر يوم من أيام المؤتمر استطاع جمال أن يوقف النزيف ويحل القضية، ولكن كان بيوقف النزيف، وبيحافظ على القضية، وبيمنع التدخل الأمريكي في الوقت اللي توقف فيه قلبه عن النبض.

<5>