(تابع) بيان الرئيس أنور السادات، في الاجتماع المشترك لمجلس الشعب واللجنة المركزية للاتحاد الاشتراكي العربي

اللي يخلي عملية البناء الاشتراكي مستمرة، لكن بنكمل معركتنا، وبعدين بننطلق في البناء كله بقى، علشان كل شبكاتنا، الميه والتليفونات والمجاري، كله يتغير مرة واحدة بس لما نخلص معركتنا.

          أي إنسان ممكن ينتقد النهاردة، وأنا بأتكلم الكلام ده للصحفيين الموجودين معانا لأن كان لهم موقف غريب، انتقادات، بقولك المطر نزل فوق التليفونات، أمال هتعملوا إيه في المعركة. المعركة من أول يوم في المعركة التليفونات هتتعطل عندنا وعندهم من أول يوم في المعركة كل شئ سيتعطل عندنا وعندهم، بل هو سيضربني وأنا سأضربه مش مشكلة. دي الفهم الصح في حوادث الطلبة. كان موقف الصحافة غريب جداً وهم معانا وقاعدين معاكم ودلوقت تسمعهم، مفيش صحفي واحد يدافع عن دولة المؤسسات وسيادة القانون، أنا مش عاوزه يدافع عن حاجة عن السلطة زي ما بيقولوا لأن بس دافعوا عن دولة المؤسسات وسيادة القانون، لأنه بدونها ماكنش حد يقدر يفتح بقه زي ما بيتكلموا دلوقت، محدش أبداً، إما خوفاً من الطلبة أو مجاراة للطلبة. وكذا أو هو ذاته مرعوب وبيقلك الدنيا راحت ليه كده ليه، ده في الصحافة جرى حتى لدرجة إن خمسة يسيطروا على نقابة الصحفيين ويصدروا قرارات، وأرسلوا ليه إنذار في بحر أسبوعين، الجمعية العامة مجتمعة وعليك انك تعمل كذا وكذا، الجمعية مجتمعة أسبوعين، إزاي هنشوف إيه هل ستحاسبني، إنذارات حاجة غريبة، تسيب سياسي وشئ غريب. ما فيش اجتماع إلا وحضروه معايا الصحفيين معايا هنا، وعارفين الصورة كاملة، إنما بقولك الوضع مش واضح انتم أكثر ناس بتعرفوا البرقيات وعارفين إيه اللي بيقال بره وعارفين إيه الصورة وعارفين إنه ما لم نعمل معركتنا لن يحس بنا العالم. إننا داخلين ومقبلين على هذا حضرتوا اجتماعاتنا كلها على مستوى المسئولية.

          للأسف ضمن التسيب السياسي اللي حصل كانت النتيجة إن التآمر أخذ مداه إلى أن مسكنا التآمر، مفيش داعي أقول تفصيلات لأنها عند المدعي الاشتراكي، هو اللي يملك إنه يقول تفصيلات عن هذا الموضوع في الوقت الذي يراه مناسب. لكن عاوز أقولكم عملية الطلبة المنشور الأول والثاني اللي طبع اتقال عليه إنه يمثل الحركة الطلابية، ويوزع باسم الطلاب للشقق اللي كانت تؤجر مفروشة، أي طالب هذا الذي يستطيع أن يؤجر شقق في شارع الهرم علشان يأوي طلبة مطلوب القبض عليهم ويأكلهم، إيه النوع الجديد من الطلبة ده. إحنا على أيامنا كنا غلابة، إيه دخول الأمهات لمدرجات الجامعة والنقابات، كل هذا موجود ومسجل أيضاً بأمر النيابة، اتمسك التآمر لكن ليس هذا ما أريد أن أتكلم عنه النهاردة معاكم. هل في مرحلة المواجهة الشاملة المقبلة فيه مكان لمثل هذا أن يتكرر تاني.

          أظن زي ما خرجنا بدرس مستفاد من عملية نشاطنا الدبلوماسي بأخرج دلوقتي بدرس مستفاد مما حدث في الجبهة الداخلية نتيجة سوء الفهم أو سوء القصد والتعمد، نحو فهم دولة المؤسسات وسيادة القانون والحريات. أظن نطلع بدرس مستفاد إننا في المرحلة المقبلة مرحلة المواجهة الشاملة، بل في مرحلة السلم أيضاً لا يجب أن نسمح لأحد أن ينال من المؤسسات ولا من سيادة القانون ولا من الحريات، ولا يتصور أن يتخذ من هذا السبيل للتآمر على البلد لا في الحرب ولا في السلم.

<13>