(تابع) خطاب الرئيس أنور السادات، في عيد العمال، 1 / 5 / 1975  
المصدر: "قال الرئيس السادات، الجزء الخامس 1975، السكرتارية الصحفية لرئيس الجمهورية، ط 1982، ص 114 - 121"  

كان يوم 4 قبل المعركة بست أيام .. أما جئتهم وكنا بنتكلم وكل واحد عرض وجهة نظره .. قلت لهم بس فيه عامل أنتم ناسيينه جميعا ولسه ما حتطوش فى حسابكم اقتصادنا وصل الى مرحلة الصفر. يعنى كان زماننا النهارده حتى المستوى اللى احنا فيه ما حناش قادرين نحصل عليه أو نلاقيه مع الشكوى منه .. ومع تقديرى أنا الظروف الصعبة اللى بيعيشها شعبنا وبيعيشها نفسه.

تجاوزنا المرحلة الحرجة في اقتصادنا
بمساعدة الأخوة العرب

          ومع ذلك استطعنا بحمد الله وبمساعدة اخواننا العرب وهنا لازم أذكرهم جميعا.. أذكر الله يرحمه الملك فيصل.. وأذكر اخونا بومدين وأذكر الشيخ زايد فى دولة الامارات وأمير قطر وأمير الكويت وأمير البحرين.. الجميع.. الجميع جم وساعدوا.. أول مبلغ .. للشيخ زايد أمير دولة الامارات.. أول مبلغ دفعه لنا استلفه من  البنوك لأنه كان أمم شركات البترول ولا فيش في الخزنة فلوس.. لكن كان لازم يبعت لمصر فاستلف المبلغ من لندن وبعته لمصر .. ده الشيخ زايد .. الملك فيصل الله يرحمه ما تأخر فى لحظة من اللحظات سواء بصفقات أسلحة أو بدعم. بومدين أثناء المعركة يسافر سرا إلى الاتحاد السوفيتى .. من غير ما يقول لحد ويروح للاتحاد السوفيتى يقول لهم اتفضلوا أدى 100 مليون دولار لمصر 100 مليون لسوريا .. أبعتوا لهم السلاح اللى همه عايزينه فى المعركة اللى همه عايزينها..

          أمير الكويت وولى عهد الكويت ما بيحبوش الاعلان ويبعتوا لى من تحت لتحت .. الدعم الفلانى .. السلاح الفلانى .. الوضع الفلانى .. كلهم بأوجه لهم بأسمكم جميعا الشكر .. ولعلىهذا يبقى مثار خجل لمعمر القذافى .. الا أنى حقيقة زى ما بحكى لكم استطعنا بمساعدة الأخوة العرب ان احنا نعدى المرحلة الحرجة في اقتصادنا سنة 1974 وبدأنا ابتداء من أواخر 1974 أو النصف الثانى من 1974 بدأنا الخطة الانتقالية ودخلنا سنة 1975 أيضا بهذه الخطة. احنا قلنا زى ما قلت لكم انى لما جمعت لجنة الأمن القومى يوم 4 رمضان .. قلت لهم اقتصادنا كان صفر .. أما انتصرنا فى المعركة بحمد الله ودخلنا على سنة 1974 وتقدم الأخوة العرب جميعا لمساعدتنا وإلى الآن سواء فيه مشاريع مشتركة أو فيه دعم وضحت لنا حقيقة .. ما نقدرش نقفل على أنفسنا الباب .. ونقول ان احنا حنبنى اقتصاد أو نبنى ازدهار البلد لأن كل احتياطياتنا واللى عندنا خالص فى سبع سنوات صمود.

          كنا زى ما بقول لكم بنصرف فيها من لحم الحى ما احناش زى اسرائيل، اسرائيل بتجيلها الشيكات لحد النهاردة احنا ما حدش بيبعت لنا شيكات احنا بنصرف من لحم الحى علشان كده وصلنا في أكتوبر سنة 1973 الاقتصاد صفر، مفيش شئ متوفر، مفيش اللى بنقول عليها فى الفلاحين الخميرة، الخميرة خلصت رخره ..

حتمية الانفتاح الاقتصادى

          كان لابد من الانفتاح الاقتصادى علشان نعوض أولا السبع سنوات اللى فاتت الصعبة وبعدين نحط الأساس للمستقبل اللى جاى علشان لا يعيش الشعب فى حرمان على طول، من هنا كان الانفتاح مش بس بنعمل بنبنى به أساس اقتصادنا، وانما بواسطة الانفتاح الاقتصادى بنتصل بالعالم كله اللى بيتقدم. أنا قلت ان احنا فى أول كلمتى هنا .. لابد أن نبنى أن نجعل من الهزيمة نقطة انطلاق لبناء دولة جديدة ... الدولة الجديدة ما تتبنيش إلا على التكنولوجيا الحديثة التكنولوجيا ما تجيناش .. إلا بالانفتاح .. الانفتاح على العالم كله ولما أقول انفتاح مش معناها على الغرب بس .. الانفتاح على الغرب وعلى الشرق على السواء كل من يستطيع أنه يساعدنا فنحن على أتم استعداد ان احنا نمد أيدينا له وننفتح عليه .. بعد حرب رمضان زى ما انتم عارفين وضح انه مش بس العرب بيملكوا الطاقة .. لا العرب أيضا بيملكوا النهارده رأس المال. بقت فى أيديهم الطاقة وفى أيديهم رأس المال، طيب بدل ما بروح أستلف من بنوك أورربا وهى فلوس العرب واستلفها بالفائدة الكبيرة، طيب ما استلف من اخواننا العرب، نفس الشئ بالنسبة للدول اللى عايزة تساعدنا أمريكا أو الاتحاد السوفيتى وهنا لازم أقول قدامكم ان أنا حريص أشد الحرص ان علاقتنا مع الاتحاد السوفيتى تكون على أحسن ما يكون .. مش حننسى له السد العالى، مش حننسى له وقوفه جنبنا فى الساعات السودة سنة 67 مش حننسى له حاجات كثيرة .. لكن كمان لا يكلف الله نفسا إلا وسعها .. أنا بعت وقلت يا جماعة لا أستطيع أن أدفع أقساط بالحجم اللى كنت بأدفعه زمان لأن عندى حالة اقتصادية صعبة ومش فى امكانى أن أطلب من الشعب من أهلى وناسى أن يربطوا الحزام أكثر مما هو مربوط فبعت طلبت فترة شئ يقولوا لها في الاقتصاد فترة سماح يعنى نأجل التسديد مش معنى ده انى ما بندفعش شئ خالص لا - ادفع مبلغ بسيط لمدة سنوات وبعدين بعد السنوات دى اللى فترة السماح ابتدى أدفع القسم العادى ولازم يكون هناك تقدير لمصاعبنا لما رجع اسماعيل فهمى من موسكو من عدة أيام قال ان الاخوان السوفيت بيقولوا ان ده نوع من فرض الشروط علينا وأنا أمامكم وأمام عمال مصر وعلى مسمع من الأمة العربية كلها احنا ما بنفرضش شروط على حد احنا عاوزين كل واحد يقدر الموقف اللى احنا فيه ويقدر الصعوبات اللى احنا فيها بالعكس لا نفرض شروط على حد .. لسبب بسيط احنا ما بنقبلش ان حد يفرض علينا شروط مهما كانت من هنا بقول أرجو ان أصدقائنا فى الاتحاد السوفيتى يقدروا الموقف اللى احنا فيه الموقف الصعب ليه لأننا ما نقدرش لا نوقف عجلة البناء ولا نقدر نوقف عجلة البناء الاجتماعى ولا بناء القوات المسلحة. اسرائيل استعوضت من أمريكا كل سلاح خسرته ثم خلال 14 شهر أخذت أسلحة اضافية أخرى احنا ما استعوضناش يدوبك ابتداء من يناير زى ما حكيت العقود القديمة المستحقة سنة 73 و 74 بدأت تيجى وأنا ممتن

<5>