(تابع) خطاب الرئيس أنور السادات، رئيس الجمهورية العربية المتحدة، في لقائه مع أساتذة الجامعات، 8 يناير 1971
المصدر: "مجموعة خطب وأحاديث الرئيس محمد أنور السادات، في الفترة من سبتمبر 1970 إلى ديسمبر 1971، الهيئة العامة للاستعلامات، ص91-109"    

        القضية النهاردة ان امريكا مش بس بتدى السلاح لاسرائيل وانما بنسمع على لسان المسئولين في اسرائيل أشياء غريبة بتقول مسز مائير وبيقول وزير خارجيتهم ووزراء كثير بيقولوا إن امريكا بتقول لهم أوعوا تنسحبوا من الارض المحتلة الا بعد اتفاقية سلام تعاقدية وان امريكا تؤيد موقفنا 100% وبعدين نلاقى المجتمع الدولى مشلول.

        فى اجتماعات الدول الاربع الكبيرة تيجى أمريكا وتسحب مندوبها. ودى عملتها عشان يضغطوا علينا واحنا فى الميتم على امل ان كل شىء ينهار.

        اجتماعات الأربعة الكبار بدأت أمريكا " تخرف " فيها علشان ما يوصلوش لنتيجة.. والمجتمع الدولى كله عاجز مشلول.

        اسرائيل بتقول علنا اننا لن يهمنا أى قرار تصدره هيئة الامم المتحدة أو مجلس الامن.. بيقولوها علنا ورسميا.

        امريكا بتدى سلاح لاسرائيل ولا تخبيش.. مدفعية ودبابات وطائرات وذخائر.. كل شىء وتعلن عنه .. كل ده تحت حجة أن سيل السلاح بيتدفق على العرب وعلى مصر من الاتحاد السوفييتي .. طيب خلينا برضه حسنى النية. وخلينا برضه ندى فرصة ونصدق امريكا اللى بتقول إنها عايزه السلام. ولابد من حل سلمى في المنطقة واحترام سيادة الدول.

        طيب منين الكلام ده ومنين المدافع اللى بتتصدر من موانى امريكا.. الطائرات الفانتوم الجديدة.. والاسلحة المضادة للصواريخ.. وصواريخ أرض أرض الجديدة كلها دى اخبار بتطلع من أمريكا.. ونسألهم يقولوا نحن لا نرد رسميا على صفقات الاسلحة التى نعقدها طيب ده كلام من جرايدكم؟.. طبعا ده كله عملية حرب نفسية !"

        أنا قلت لمحمود رياض روح وانت فى الامم المتحدة قول للامريكان الآتي:

        انتم عاوزين ايه ؟

        تعالوا يحط كل واحد ورقه على الترابيزة.. واضح إن المشكلة لم تعد اسرائيل .. المشكلة أمريكا.. قولوا انتم عايزين ايه ؟

<10>