(تابع) خطاب الرئيس أنور السادات، رئيس الجمهورية العربية المتحدة، في لقائه مع أساتذة الجامعات، 8 يناير 1971
المصدر: "مجموعة خطب وأحاديث الرئيس محمد أنور السادات، في الفترة من سبتمبر 1970 إلى ديسمبر 1971، الهيئة العامة للاستعلامات، ص91-109"    

          الى يومنا هذا لم يأت رد أمريكا .. بس تقول أنا عاوزه السلام .. طيب هل السلام وانتم بتدوها فانتوم وتحرضوها على احتلال الارض العربية ؟ هل السلام ، انى أقعد مع اسرائيل على ترابيزة واحدة ؟ ده مش سلام ده استسلام. لكن هم بيقولوا.. أصل انتم خسرتم المعركة ولازم توافقوا على شوية تنازلات.

         التعليل الوحيد اللى لقيته لمسلك امريكا أنهم عاوزين اننا نقبل بشروط المهزوم لاننا مهزومين ومتأخرين ولن نستطيع اللحاق باسرائيل .

        الكلام ده كرروه كتير واتقال شىء منه للدكتور فوزى فى جنازة ايزنهاور وبيكرره رجال الخارجية الامريكية .. هل احنا على استعداد لان نقبل منطق امريكا بأى نعامل معاملة المهزومين فنقبل بشروط المهزوم ؟

        وهل نحن على استعداد لان نقبل بأننا أمة متخلفة ولن نستطيع لا علميا ولا اجتماعيا ولا على أى صورة من الصور أن نلحق باسرائيل أو بالركب العلمى والتقدم والتكنولوجيا ؟

        مش لاقى تفسير لموقف أمريكا الا هذا..

خرجنا أقوياء

        فى وقت من الاوقات قال احد مستشارى نيكسون يجب ألا تخرج مصر قوية من من هذه المعركة.

        طيب.. ادى احنا خرجنا أقوياء النهارده بعد 3 سنوات ونصف اقتصاديا وسياسيا وعسكريا حتى اننا مش عدينا مرحلة الخطر، انما استطيع أن اقول إن احنا أقوياء .. اقتصاديا.. السد العالى انتهى وجميع المصانع انتهى التعاقد عليها.. السد العالى الثانى وهو مجمع الحديد والصلب تعاقدنا عليه وتم صرف 85 مليون جنيه من تكاليفه التى تبلغ 400 مليون.. التنمية عندنا 300 مليون جنيه و560 مليون للجيش وبنستوعب الخريجين كلهم..

        صحيح بنحس بالضيق لكن كلنا بندفع.. دى ضريبة لازم ندفعها وما نرجعش مرة تانية راكعين.

<11>