(تابع) خطاب الرئيس أنور السادات، رئيس الجمهورية العربية المتحدة، في لقائه مع أساتذة الجامعات، 8 يناير 1971
المصدر: "مجموعة خطب وأحاديث الرئيس محمد أنور السادات، في الفترة من سبتمبر 1970 إلى ديسمبر 1971، الهيئة العامة للاستعلامات، ص91-109"  

        زى ما حكيت لحضراتكم في هذه القاعة سنة 1969، كان ده المدخل لاتفاقية كسر قيد السلاح اللي عقدناها فى سبتمبر سنة 1955، واللى بمقتضاها استطعنا أن نزود جيشنا بالأسلحة الحديثة من روسيا والمعسكر الشرقى.

        زى ما حكيت.. اسرائيل ماشية في تحقيق الحلم الكبير.. أى منطقة منزوعة السلاح تأخدها. أم الرشراش وبعدين جت مؤامرة سنة 1956.

        ايه اللى حصل بيننا وبين اسرائيل عشان تهجم علينا... المعركة كانت بيننا وبين فرنسا وانجلترا علشان تأميم قناة السويس وكانت المشكلة أصلا علشان نبنى السد العالى اللى تم، واللى سنحتفل- ان شاء الله- بعد أيام قليلة باتمامه. انتهزوا الفرصة ودخلوا فى مؤامرة.. اسرائيل- وكلنا عارفين أسرارها، والمعاهدة التى عقدتها بين بن جوريون وبريطانيا- اسرائيل قاعدة ومصرة للوصول الى الهدف النهائى من النيل الى الفرات.

        سنة 1956، انتهت بانسحاب اسرائيل وبريطانيا وفرنسا.

        ومنذ ذلك التاريخ، لم تضيع اسرائيل لحظة واحدة علشان المعركة المقبلة، لان لسه الحلم متحققش. وحته حته مضيعتش لحظة. ابتدت تعد جيثس وسلاح الطيران من سنة 1956، وحطت كل امكانياتها وكل ما تستطيع الحصول عليه من بره، من الصهيونية العالمية.

        كرست كل هذا عشان المعركة المقبلة وجت سنة 1967، وكلنا نذكر ابتداء معركة الحشود على سوريا وبعدين اعلان اشكول واعلان الجيش انهم فى سبيلهم لاحتلال دمشق. وبعدين احنا حشدنا قوتنا فى سيناء احنا تربطنا بسوريا اتفاقات. همه قاعدين من 10 سنين قبلها يجهزوا للمعركة.

        فى هذا الوقت دايما الصهيونية لازم تلاقى قوة كبرى تتصل بها كعميل عشان تسندها. وزى ما احنا عارفين- النهارده رسيت على الولايات المتحدة . العدوان سنة 1967. بدأ بموافقة أمريكا وما أنكرتش، بل وبموافقة الرئيس ليندون جونسون وبإشارة  منه. ولم تنكر أمريكا.. واللى كتب هذا الصحف الامريكية والمجلات الامريكية. قالوا ان الخطة بالكامل عرضت على الرئيس ليندون جونسون اللي

<6>