(تابع) خطاب الرئيس أنور السادات، رئيس الجمهورية العربية المتحدة، في لقائه مع أساتذة الجامعات، 8 يناير 1971
المصدر: "مجموعة خطب وأحاديث الرئيس محمد أنور السادات، في الفترة من سبتمبر 1970 إلى ديسمبر 1971، الهيئة العامة للاستعلامات، ص91-109"    

         الرئيس نيكسون تعهد فى حملته الانتخابية أن يحفظ لاسرائيل التفوق فى السلاح على العرب مجتمعين.. بس يظهر مش عايز يقول ده دلوقت وبيقول بنظرية القرن الـ 19 عن ميزان القوى .. عشان كده  بيدوا اسرائيل سلاح.

قصة مبادرة روجرز

       لما قبلنا مبادرة روجرز فى الصيف الماضى كانت تتضمن نقطتين: تنفيذ قرار مجلس الامن والاتصال بيارنج.. ووقف اطلاق النار لمدة 90 يوم علشان ندى فرصة لهذا الاتصال.

       وافقنا على المبادرة وجت امريكا وهي باعته هذا الكلام رسميا.. وباعته أيضا رسميا انه فى خلال الـ 90 يوم لن تسلم أمريكا لاسرائيل أى نوع من أنواع الأسلحة.

       فوجئنا أن العالم كله امتلأ بدعاوى اسرائيل بأن مصر خرقت وقف اطلاق النار .. وجت الفترة اللى عقد فيها مؤتمر القمة العربى لمناقشة احداث الاردن ثم وفاة الرئيس وفترة الاحزان وانشغلنا في مأتمنا.. انتهزت أمريكا هذه الفرصة عشان تقول أن القضية مش قضية احتلال اسرائيل لارض عربية.. لا.. دى قضية خرق مصر لوقف اطلاق النار!

        وعلى هذا الاساس بدأ سيل الاسلحة يتدفق على اسرائيل مخالفا للكلام اللى قالته أمريكا بأنها لن تسلم اسرائيل خلال فترة وقف اطلاق النار اى سلاح..

       كل ده مش عايزين نفقد الهدف .. عايزين نشخص المشكلة علشان نعرف الوضع اللى احنا فيه النهارده .

امريكا تحرض اسرائيل

       المشكلة النهارده بعد وقف اطلاق النار وقبولنا لتجديد وقف اطلاق النار مرة ثانية بناء على قرار من الجمعية العامة للأمم المتحدة.

       لما راح محمود رياض وأثار القضية هناك ضد ارادة أمريكا.. استطاع أن يحصل على قرار ضد أمريكا واسرائيل وان يارنج لازم يتقدم بتقرير فى ظرف 60 يوم يعنى فى 5  يناير اللى احنا  فيه..

<9>